Stofnmat og ráðgjöf vegna brimbúts (sæbjúga)

Brimbútur, öðru nafni Sæbjúga.

Hafrannsóknastofnun leggur til í samræmi við nýtingarstefnu sem mun leiða til hámarksafraksturs til lengri tíma litið, að afli sæbjúgna á átta veiðisvæðum við Ísland verði ekki meiri en 1.717 tonn árið 2027. Þetta er um 21 % lækkun frá ráðgjöf síðasta árs. Ráðgjöf um aflamark eftir veiðisvæðum má sjá hér fyrir neðan:

Mesta lækkunin verður í Faxaflóa (svæði E) og suðursvæðinu við Austurland (svæði H) þar sem lífmassavísitalan hefur lækkað á báðum svæðum. Mið- og norðursvæðin við Austurland (svæði G og F) lækka einnig töluvert. Á miðsvæðinu (G) er lífmassavísitalan mjög sveiflukennd en hefur lækkað töluvert undanfarin tvö ár og á norðursvæðinu (F) er einnig lækkun á lífmassavísitölu undanfarin tvö ár.

Við Aðalvík (svæði A) verður einnig lækkun þar sem meðal lífmassavísitala undanfarinna tveggja ára er lægri en þriggja áranna þar á undan. Það er aðeins eitt svæði með aukningu á ráðgjöf, eða miðsvæðið á Vestfjörðum (svæði B), en þar hefur orðið aukning á lífmassa undanfarin tvö ár. Ráðgjöf fyrir svæði C og D stendur óbreytt, en engin könnun hefur farið þar fram undanfarin ár og aflinn hefur að mestu leyti verið undir ráðlögðu aflamarki.

Hér má sjá ráðgjafarskjal og tækniskjal fyrir brimbút.