Kortlagning búsvæða á hafsbotni

Markmið verkefnisins er að skilgreina helstu búsvæði í hafinu kringum Ísland, skrá útbreiðslu þeirra og umfang og jafnframt að meta mikilvægi þeirra og þörf fyrir verndun.

Búsvæði á hafsbotni mótast af landslagi og setgerð botnsins, dýpi, hita, seltu, straumum og þeim lífverum sem eru til staðar á hverju svæði. Þannig er tegundasamsetning botndýra ólík eftir því á hvað dýpi þau eru eða hvort þau eru fyrir norðan land, þar sem er kaldur sjór og gjarnan tegundir sem eru tengdar við heimskautin, eða fyrir sunnan þar sem er hlýrri sjór. Allt stuðlar þetta að miklum fjölbreytileika lífríkisins.

Kortlagning á búsvæða er undirstaða þess að geta metið áhrif og eða breytingar á vistkerfið svo hægt sé að nýta auðlindir hafsins á ábyrgan hátt og vernda þau svæði sem sérstakega þarf að gæta.

Viðkvæm búsvæði

Kóralsvæði eru dæmi um sérstök eða viðkvæm búsvæði sem mikil þörf er á að vernda. Nú þegar hafa nokkur kórasvæði verið vernduð og unnið er að því að skilgreina fleiri viðkvæm búsvæði. Kóralsvæðin eru aðallega á landgrunnskantinum fyrir sunnan land. Kóralrif eru einnig uppi á kantinum en þar eru þau mikið skemmd enda nálægt eða á miðri togslóð. Einnig finnst kórall út af Vesturlandi og Vestfjörðum.

Rannsóknaaðferðir

Við kortlagningu á viðkvæmum svæðum eða tegundum er nauðsynlegt að nota tækjabúnað sem veldur sem minnstum skaða. Því eru fyrst og fremst notaðar neðansjávarmyndavélar, bæði kvikmyndaupptökuvélar og ljósmyndavélar. Ljósleiðarkapall flytur myndefnið frá myndavélunum um borð í rannsóknaskipið þar sem það er sýnilegt á skjám og samtímis er það afritað í gagnaskrár. Stafrænar ljósmyndir eru teknar reglulega en einnig þegar nýjar tegundir birtast eða eitthvað áhugavert sést.

 

 

Fannst þér efnið á síðunni hjálplegt?