Eggert Benedikt skipaður forstjóri Hafrannsóknastofnunar

Hanna Katrín Friðriksson atvinnuvegaráðherra hefur ákveðið að skipa Eggert Benedikt Guðmundsson í embætti forstjóra Hafrannsóknastofnunar, rannsókna- og ráðgjafastofnunar hafs og vatna til fimm ára.

Embættið var auglýst laust til umsóknar þann 5. maí síðastliðinn og bárust alls átta umsóknir. Ráðherra skipaði þriggja manna ráðgefandi hæfnisnefnd til að leggja mat á hæfni umsækjenda.
Eggert lauk meistaranámi í rafmagnsverkfræði frá Háskólanum í Karlsruhe árið 1990, MBA prófi árið 1997 frá IESE viðskiptaháskólanum í Barcelona og stjórnunarnámi (AMP) árið 2012 frá sama skóla.

Eggert hefur fjölbreytta reynslu úr atvinnulífinu, einkum af æðstu stjórnunar- og leiðtogastörfum. Frá október 2025 hefur Eggert verið starfandi forstjóri Hafrannsóknarstofnunar þegar hann var settur tímabundið í embættið. Á árunum 2022 til 2025 starfaði Eggert sem leiðtogi á sviði sjálfbærrar þróunar í forsætisráðuneytinu og var forstöðumaður Grænvangs, samstarfsvettvangs stjórnvalda og atvinnulífs um loftslagsmál og grænar lausnir á árunum 2019 til 2021.

Eggert gegndi starfi forstjóra HB Granda hf. á árunum 2005 til 2012, en áður var hann markaðsstjóri sama fyrirtækis frá árinu 2004. Frá árinu 2012 til 2015 var Eggert forstjóri N1 hf. Þá var hann forstjóri eTactica ehf., nýsköpunarfyrirtækis á sviði raforkueftirlitskerfa, á árunum 2016 til 2018 og ráðgjafi hjá IceCure ehf. á árunum 2015 til 2024. Eggert starfaði hjá Philips Electronics á árunum 1997 til 2004, meðal annars sem forstöðumaður viðskiptaþróunar í Bandaríkjunum.

Eggert hefur gegnt fjölmörgum stjórnar- og trúnaðarstörfum, m.a. sem formaður Leikfélags Reykjavíkur og stjórnarmaður hjá Landsneti hf., HB Granda hf. og Brimi hf., Viðskiptaráði Íslands, Íslandsstofu og Háskólanum í Reykjavík.

Sjá nánar á vef atvinnuvegaráðuneytisins.