Slétthali

Slétthali getur náð um 110 cm lengd en er sjaldan stærri en 80-90 cm.

Heimkynni slétthala eru í Norðaustur-Atlantshafi frá Biskajaflóa, norður fyrir Bretlandseyjar til Noregs, Færeyja og Íslands. Þá er hann við Grænland, Labrador og Nýfundnaland.

Við Ísland er hann á djúpmiðum suðaustanlands vestur með Suðurlandi og Suðvesturlandi norður á djúpmið Vestanlands. Hann er víða algengur á þessum slóðum.

Slétthali er botn- og djúpfiskur sem veiðst hefur á 180-2195 m dýpi.

Fæða er einkum allskonar krabbadýr en einnig smokkfiskar og fiskar m.a. laxsíldir.

Slétthali hefur verið veiddur í botn- og flotvörpur, einkum af Rússum, og nýttur sem matfiskur, en Íslendingar hafa aldrei veitt mikið af slétthala.