100 ára afmæli Þórunnar Þórðardóttur í dag!

Í dag fögnuðu rannsóknarmenn og áhöfn um borð í nýju rannsóknaskipi Hafrannsóknastofnunar, Þórunni Þórðardóttur, í tilefni þess að 100 ár eru liðin frá fæðingu Þórunnar heitinnar Þórðardóttur, sem skipið ber nafn sitt af.

Þórunn var brautryðjandi í íslenskum hafrannsóknum og lagði mikið af mörkum til þekkingar á þörungum og lífríki hafsins. Hún tók sjálf þátt í fjölmörgum vorleiðöngrum á sinni starfsævi, og því þótti viðeigandi að minnast hennar í vorleiðangri dagsins.

Lagt var af stað í vorleiðangurinn þann 13. maí frá Hafnarfirði; hann er hluti af langtímavöktun á ástandi sjávar, næringarefnum, gróðri og átu á hafsvæðinu við Ísland. Góð stemning ríkir um borð, þar sem fortíð, nútíð og framtíð íslenskra hafrannsókna mætast og minning Þórunnar Þórðardóttur er heiðruð með virðingu og þakklæti.