Niðurstöður á efnamælingum í vatni í Silfru á Þingvöllum. HV 2023-08

Í þessari skýrslu er gerð grein fyrir niðurstöðum mælinga á efnum í vatni, af náttúrulegum eða manngerðum uppruna, sem sprettur fram í lindinni Silfru á Þingvöllum þaðan sem mikið af vatni Þingvallavatns á uppruna sinn. Tilgangur mælinganna var að afla upplýsinga um hvort starfsemi köfunarfyrirtækja í Silfru hefði áhrif á styrk mældra efna í vatninu. Mæld voru efni sem eru í manngerðu umhverfi með áherslu á efni sem geta verið í hreinlætis- og snyrtivörum, svo sem lífrænt kolefni, fitu, þalöt, terpene efni, PFAS-efni, auk þess sem grugg var mælt til að meta áhrif af auknu uppgruggi af völdum kafaranna. Niðurstaða rannsóknarinnar bendir til þess að sú köfunarstarfsemi sem stunduð hefur verið í Silfru hafi ekki áhrif á styrk efna sem mæld voru í lindarvatninu. Bent er á að mikilvægt er að fylgjast með styrk þessara efna í Silfru á næstu árum til að hægt sé að bregðast við ef einhverjar breytingar verða á þeim.