Botngerðarmat á vatnasvæði Hítarár á Mýrum. HV 2018-47

Hítará á upptök í Hítarvatni, stóru stöðuvatni (7,6 km2) sem liggur í 147 m hæð yfir sjávarmáli. Áin rennur rúmlega 30 km leið til sjávar, í fyrstu niður Hítardal um Kattarfoss en síðan eftir mýrarflóa niður í Akraós. Fjölmargar hliðarár falla til Hítarár, flestar að austanverðu þar sem mest kveður að Tálma, Grjótá og Melsá. Hraun þekja stóran hluta af vatnasviðinu og er vatnafar á svæðinu flókið þar sem lindáreinkenni eru ríkjandi í vatnafari en dragáreinkenna gætir einnig.