Leiftrar leita inn í Hafnarfjarðarhöfn

Leiftur eða leifturhnýðingur í Hafnarfjarðarhöfn. Mynd: Melanie Stock.

Gestir og gangandi í Hafnarfirði fengu óvænta heimsókn í vikunni því hópur höfrunga af tegundinni Leucopleurus acutus sem er ýmist nefnd leifturhnýðir, eða leiftur á íslensku, hefur haldið sig í höfninni. Leiftur er smávaxinn höfrungategund sem lifir undan ströndum Íslands. Þeir eru yfirleitt ekki meira en þrír metrar að lengd, um 200 kg, með stutt trýni og stórt aftursveigt horn. Leiftur, ásamt hnýðingi, er meðal algengustu tegunda höfrunga við landið og í síðustu hvalatalningu hljóðaði matið uppá rúmlega 130.000 dýr.

Það er hinsvegar fremur sjaldgæft að þeir haldi sig við hafnir landsins í fæðisleit. Af vef Náttúrufræðistofnunar má lesa eftirfarandi um leiftra: „Útbreiðsla leifturs er að mestu bundin við kaldtempruð og tempruð svæði Norður Atlantshafs. Norðurmörk útbreiðslunnar í Mið-Norður Atlantshafi liggja um íslensk hafsvæði og er tegundin algeng við og utan við landgrunnsbrúnir einkum í syðri hluta landhelginnar. Árstíðabundið far er talið tengjast breytingum á fæðuframboði og er mismunandi eftir hafsvæðum. Leiftur heldur sig aðallega á úthafinu og er algengasta höfrungategundin við Færeyjar.“ Sjá meira hér.

Myndirnar á síðunni voru teknar af Melanie Stock doktorsnema hjá Hafrannsóknastofnun.