Ert þú með snilldarheiti fyrir LIFE Icewater á íslensku?

Hvað á LIFE Icewater eiginlega að heita á íslensku? Nú er tækifærið til að koma með hugmynd!

LIFE Icewater er stórt samstarfsverkefni sem styður við framkvæmd vatnaáætlunar á Íslandi. Innan verkefnisins er meðal annars unnið að:

• vöktun og aukinni þekkingu á ástandi vatns,
• bættri fráveitu og minni mengun,
• sjálfbærri nýtingu vatns,
• vernd og endurheimt vatnavistkerfa,
• eflingu stjórnsýslu og samstarfs um vatnamál,
• fræðslu og miðlun um vatnamál.

Nú leitum við að íslensku heiti sem nær vel utan um verkefnið. Nafni sem er lipurt, eftirminnilegt og hentar vel í miðlun og kynningu. 

Opið er fyrir tillögur 24.–30. ágúst. Vinsamlega sendu inn þína tillögu á þessu eyðublaði. 

Að keppni lokinni fer valnefnd yfir tillögurnar og velur það heiti sem best þykir henta verkefninu. Í nefndinni sitja fulltrúar þeirra stofnana sem koma að gerð og framkvæmd vatnaáætlunar: Veðurstofu Íslands, Náttúrufræðistofnunar, Hafrannsóknastofnunar og Umhverfis- og orkustofnunar, auk Önnu Sigríðar Þráinsdóttur, málfarsráðunautar RÚV. Tillögurnar verða lagðar fyrir nefndina án upplýsinga um hver sendi þær inn.

Sigurhugmyndin verður verðlaunuð með gjafabréfi í Reykjaböðum, nýju baðlóni við jaðar Hveragerðis.