Fiskmerkingar

Í lífsferli margra fisktegunda felst ártíðabundið far (göngur) milli svæða. Oftast snúast göngur um ferðir frá uppeldissvæði til hrygningarsvæðis eða af hrygningarsvæði á fæðuslóð. Tilgangurinn með slíkum langferðum er að vera á svæðum sem eru hvað hagstæðust með tilliti til hvar einstaklingurinn er staddur í lífsferlinum. Fyrir ungviði er til dæmis best að vera á svæðum þar sem hægt er að leita skjóls fyrir afræningjum og hentug fæða er til staðar.

Við Ísland hafa merkingar verið notaðar til að rannsaka far fiska í meira en öld.
Til að fylgjast með ferðum fiska eru oft notuð merki sem fest eru á þá. Við merkingu eru skráðar ýmsar upplýsingar, svo sem lengd fisksins og upplýsingar um merkingarstað (tími, hnit, dýpi). Þegar fiskurinn endurheimtist eru síðan aftur skráðar upplýsingar eins og lengd, þyngd, kyn, kynþroski og aldur fisksins ásamt hnitum og tíma. Tilgangurinn er að fylgjast með því hvar fiskarnir halda til og hvort og þá hvenær þeir leggja í langferðir. Þegar fiskar eru merktir á hrygningarslóð er til dæmis hægt að fylgjast með því hvert þeir fara í fæðuleit og hvort þeir komi aftur á sömu hrygningarslóð næstu ár. Rannsóknirnar byggjast á því að fiskar eru merktir á ákveðnum svæðum en til að fá upplýsingar þarf að endurheimta fiskinn. Það tekur því yfirleitt nokkur ár að fá niðurstöður merkinga og mikilvægt er að endurheimta töluverðan fjölda fiska til að fá mynd af göngumynstri hópsins.

Fyrirspurnir vegna merkinga/skil á endurheimtum má senda á merki[hjá]hafogvatn.is

Merki
Skil á merkjum
Merkingaverkefni í gangi

mynd með leiðbeiningum
   

Uppfært 28. september 2022.

Fannst þér efnið á síðunni hjálplegt?