Vatnakerfi Blöndu 2015. Seiðarannsóknir, stangaveiði og göngufiskur

Í þessari skýrslu er að finna niðurstöður um seiðarannsóknir og stangaveiði í Blöndu og Svartá sumarið 2015, auk fiskgengdar um fiskteljara í Ennisflúðum. Einnig er gerð grein fyrir niðurstöðum mælinga á vatnshita í Blöndu. Þéttleiki og ástand seiða var kannað með rafveiðum í Blöndu og Svartá í lok ágúst. Laxaseiði veiddust á öllum stöðvunum í Blöndu og voru þau vorgömul til þriggja ára. Bleikju- og urriðaseiði veiddust á þremur stöðvum. Laxaseiði veiddust á öllum stöðvum í Svartá, auk bleikju- og urriðaseiða á fimm stöðvum. Vísitala þéttleika laxaseiða hefur haldist há í sögulegu samhengi í báðum ánum síðustu fjögur sumur. Alls veiddust 4.549 laxar (afli) í vatnakerfinu sumarið 2015.