Mæling á vatnshita Blöndu í Blöndudal og Rugludalsá 2009-2011

Blanda í Húnavatnssýslu var virkjuð 1991, þegar byggð var stífla við Reftjarnarbungu og til varð Blöndulón (um 57 km2). Vatni er veitt úr lóninu um skurði og vötn á heiðinni að stöðvarhúsi ofan Eiðsstaða og fellur aftur út í farveg Blöndu þar skammt neðar. Jökulvatnið fellur því ekki lengur um farveg Blöndu í Blöndudal ofan útfallsins og í Blöndugili, utan stuttan tíma síðsumars/haust þegar vatn rennur úr Blöndulóni um yfirfall á stíflu. Vatnið sem rennur um farveg Blöndu á þessum kafla hefur því einkenni lindarskotinnar dragár mestan hluta ársins, í stað jökulvatnsins sem þar var áður. Í tengslum við mat á ástandi fiskstofna á kaflanum frá útfalli virkjunar að lónstíflu árið 2009, var þá komið fyrir síritandi hitamælum á fjórum stöðum. Þeir voru staðsettir í Blöndu ofan Rugludals, Blöndu ofan við útfall virkjunar, í Blöndu við brú við Löngumýri og neðst í Rugludalsá. Mælarnir skráðu vatnshita einu sinni á klukkustund og voru teknir upp vorið 2011. Minni sveiflur voru í vatnshita í Blöndu neðan útfalls en ofan þess, sem skýrist af áhrifum frá miklu rúmmáli vatns í lóninu og veituleiðinni sem minnkar sveiflur í vatnshita með breytingum í lofthita. Allmikið samræmi var á tímabilinu í vatnshita Blöndu og Vesturdalsá í Vopnafirði.