Rannsóknir á urriðastofnum Hraunsfjarðarvatns og Baulárvallavatns árið 2025

Ágrip

Múlavirkjun hóf framleiðslu rafmagns í nóvember 2005. Vegna byggingar og reksturs virkjunarinnar hafa farið fram rannsóknir á urriðastofnum Baulárvallavatns og Hraunsfjarðarvatns frá árinu 2003. Í þessari skýrslu er gerð grein fyrir niðurstöðum rannsóknar á urriðastofnum vatnanna árið 2025. Rannsóknin náði bæði til urriðaseiða í vatnsföllum við vötnin ásamt urriða í sjálfum vötnunum. Mat á fjölda urriða í vötnunum, mælt sem afli á sóknareiningu, var 7,7 urriðar í báðum vötnunum. Þetta var aðeins undir langtíma meðalafla á sóknareiningu í Baulárvallavatni (9,6 urriðar) og í Hraunsfjarðarvatni ( 8,6 urriðar). Í Hraunsfjarðarvatni jókst afli á sóknareiningu mikið á milli áranna 2003 til 2008 en hefur verið nokkuð stöðugur á milli 7,3 og 10,4 urriðar síðan. Í Baulárvallavatni hefur afli verið stöðugur á milli 7,4 og 10,7 urriðar frá upphafi rannsóknatímans. Lengdar og aldursdreifing urriða í vötnunum hefur ekki tekið miklum breytingum yfir rannsóknatímann og niðurstöður benda ekki til að brestur hafi orðið í hrygningu og nýliðun. Samkvæmt niðurstöðum rafveiða var vísitala þéttleika urriðaseiða í Fosslæk við Hraunsfjarðarvatn árið 2025 talsvert yfir langtímameðaltali fyrir bæði 0⁺ og 1⁺ urriðaseiði. Vísitala þéttleika urriðaseiða í vatnsföllum við Baulárvallavatn var rétt yfir langtímameðaltali. Þar var vísitala 0⁺ seiða yfir langtímameðaltali en 1⁺ var undir meðaltali. Miklar sveiflur hafa verið í vísitölu þéttleika og aldurssamsetningu urriðaseiða í vatnsföllum við bæði vötnin yfir rannsóknatímann. Niðurstöður rannsókna benda ekki til að breytingar hafi orðið á fjölda, vexti og aldurssamsetningu urriða umfram það sem viðbúið er við náttúrulegar aðstæður .