Ráðgjöf óbreytt eftir síðustu loðnumælingar

Leiðarlínur Polar Ammassak (bleik) og Aðalsteins Jónssonar (blá) dagana 24. febrúar til 1. mars 2025 norðvestur af Íslandi og dreifing loðnu (lengd þverlína á siglingastefnu skipanna sýnir þéttleikann).
Smellið á myndina til að sjá hana stærri.

Uppsjávarveiðiskipin Aðalsteinn Jónsson og Polar Ammassak voru í samvinnu við Hafrannsóknastofnun við loðnurannsóknir í síðustu viku. Markmiðið var að kanna hvort meira af loðnu hefði skilað sér inn á norðvesturmið síðan loðnumælingar fóru fram þar í fyrri hluta febrúarmánuðar. Magnið af loðnu sem mældist nú var ívið lægra en fyrri mælingin og því ljóst að ekkert hafi bæst við loðnugönguna. Fyrri ráðgjöf Hafrannsóknastofnunar um veiðar á 8589 tonn loðnu á yfirstandandi vertíð stendur því óbreytt.

Mest af loðnunni var að finna á grunnunum út af Húnaflóa og Skagafirði (sjá skýringarmynd). Hafrannsóknastofnun áformar ekki fleiri loðnumælingar þennan veturinn.