Nýjum tækjabúnaði bætt við rannsóknaaðstöðu Hafrannsóknastofnunar

Mia Cerfonteyn, doktorsnemi á Hafrannsóknastofnun við uppsetningu á FlowCam búnaðinum.

Háþróaður tækjakostur, FlowCam, var nýverið keyptur frá Fluid Imaging Technologies og komið fyrir á rannsóknastofu umhverfissviðs Hafrannsóknastofnunar. Grunneining búnaðarins er smásjá og háskerpu myndavél, sem myndar agnir sem flæða framhjá linsunni í sérstakri flæðikúvettu. Flæðinu er stýrt með innibyggðri tölvu, sem jafnframt notar hugbúnað til að greina og flokka stafrænar myndir í samræmi við úrval skilgreindra mynda.

Tækjakaupin voru styrkt af Innviðastjóði Rannís. Búnaðurinn kemur sér vel til greininga á svifþörungum í samvinnuverkefni Hafrannsóknastofnunar og Matís, Örverur á Íslandmiðum (MIME). Árið 2016 hlaut verkefnið öndvegisstyrk Rannís til þriggja ára. Vinna doktorsnemans Miu Cerfonteyn við greiningar á svifþörungum í FlowCam er liður í rannsóknum Hafrannsóknastofnunar í þágu verkefnisins og verður fyrirferðamikill þáttur í doktorverkefni hennar, sem nefnist The distribution, diversity and abundance of phytoplankton in Icelandic marine waters in context of environmental changes.

Myndir af Thalassiosira, keðjumyndandi ættkvísl kísilþörunga, sem voru teknar í FlowCam og hafðar til viðmiðunar í myndgreiningahugbúnaðinum við flokkun á greindum sjósýnum.