Rækja

Útlit

Stóri kampalampi er af ætt rækja Caridea. Hann hefur langt og mjótt spjót sem bognar örlítið niður á við fyrir ofan augun og smáar tennur sem eru bæði ofan og neðan á spjótinu. Stuttur gaddur er á þriðja baklið. Annað fótapar er mislangt, þar sem hægri fóturinn er styttri. Heildarlengd stóra kampalampa verður mest um 16,5 cm.  

Heimkynni

Stóri kampalampi hefur útbreiðslu víða í Norður‐Atlantshafi. Hann er algengur í köldum sjó á 10 – 700 m dýpi, en hefur fundist niður á 1330 m dýpi. Stóri kampalampi finnst allt í kringum landið, bæði innan fjarða og í úthafinu (27. mynd). Hann er algengasta rækjutegundin við Ísland og hefur fundist frá 11 m á allt að 1900 m dýpi þó skráningar á meira en 1000 m dýpi séu fáar. Hann hefur fundist þar sem hitastig hefur verið á bilinu ‐1,8 – 10,6°C.

Lífshættir

Búsvæði stóra kampalampa er við leirbotn þar sem tegundin lifir á plöntu‐ og dýrasvifi. Stóri kampalampi er tvíkynja, er fyrst karldýr en verður kvendýr síðar á ævinni. Hitastig sjávar stjórnar því hvenær kynskiptin eiga sér stað, því kaldari sjór því lengur er einstaklingurinn karldýr . Stóri kampalampi er algeng bráð margra fisktegunda en einnig er hann bráð hvala og fugla. Rækjustofnar eru viðkvæmir fyrir afráni og eru litlir á svæðum þar sem afrán er mikið en geta vaxið hratt ef afræningjum fækkar verulega . Líftími stóra kampalampa getur orðið allt að 11 ár.

Nytjar

Stóri kampalampi er mjög mikilvæg sjávarafurð og er langmest veidda kaldsjávarrækjutegund í heimi. Stóri kampalampi er eina rækjutegundin sem nytjuð er hér við land. Þó tegundina megi finna allt í kringum landið þá er helstu veiðisvæðin að finna norður af landinu og inni á fjörðum vestan‐ og norðanlands. 

Heimildir/ítarefni

https://www.hafogvatn.is/static/research/files/1537271145-hv2018-40.pdf